Վեհափա՛ռ Տեր,

Արարատյան Հայրապետական թեմի հավատավոր զավակների և հոգևորականաց դասի անունից շնորհավորում ենք Ձերդ Վեհափառությանը՝ գահակալության 25-ամյակի առթիվ:

Ձե՛րդ Սրբություն, Դուք մեկ քառորդ դար շարունակ Ձեր հովվապետական բարձունքից ամենքիս ուսուցանում եք հավատքով ապրելու և առաջնորդվելու կերպը, ներշնչում եք կամք ու կորով, ուժականություն և տոկունություն՝ դժվարություններին դիմակայելու և մեր սուրբ հայրերի թողած ճշմարտության առաքելության ուղիներով հաստատուն քայլելու համար: «Շատ բան զոհեց մեր ժողովուրդը իր պատմության ընթացքում, բայց հավատարիմ մնաց իր հավատքին և Հայ Եկեղեցու թևերի ներքո ապրեց` վկայելով, որ հոգու խորհուրդը կյանքն է ու կենդանությունը, նորոգությունն ու արարումը: Էջմիածնածնունդ իր հոգով ապրեց ինքնաճանաչ, ինքնավայել, ստեղծեց ու ստեղծագործեց… Հայ ենք մենք: Հավատարիմ մնանք Էջմիածնածնունդ մեր հոգուն, միշտ հավատանք, որ հոգու խորհուրդը կյանքն է ու Աստծո Ողորմած Աջի ներքո մնանք հարազատ զավակները հայ ազգի…» (Գարեգին Երկրորդ Կաթողիկոս):

Աղոթական հոգով հայցում ենք առ Աստված, որ Երկնավոր Տերը երկար և քաջառողջ տարիներ պարգևի Ձերդ Սրբությանը: Թող Տիրոջ զորակցությունը և առաջնորդությունը ևս առավել բեղումնալից դարձնեն Ձեր գահակալության տարիները՝ ի փառս Աստծո, ի շահ ազգիս Հայոց և ի պայծառություն Հայաստանյայց Առաքելական Սուրբ Եկեղեցու:

Մատչիմ ի համբույր Ձերդ Սրբության Սուրբ և Օծյալ Աջույն՝
ՆԱՎԱՍԱՐԴ ԱՐՔԵՊԻՍԿՈՊՈՍ ԿՃՈՅԱՆ