Հայաստանի երկրորդ նախագահ, «Հայաստան» դաշինքից վարչապետի թեկնածու Ռոբերտ Քոչարյանը մի խումբ լրագրողների, այդ թվում՝ NEWS.am-ի թղթակցին տված հարցազրույցում հայտարարել է, որ եվրոպական շուկաներ արագ դուրս գալու վերաբերյալ իշխանությունների տնտեսական խոստումները, իր կարծիքով, անիրատեսական են և մոլորության մեջ են գցում հասարակությանը:
Գովազդ A2
Մեկնաբանելով արտահանման վերակողմնորոշման և դեպի Եվրոպա մատակարարումների ընդլայնման մասին հայտարարությունները՝ նա նման ակնկալիքներն անվանել է «հերթական պատրանքներ»։
«Դրանք հերթական հեքիաթներն են, որոնցով փորձում են կերակրել մեր ժողովրդին։ Մենք շատ կախված ենք ռուսական շուկայից։ Ինչ էլ որ ասեն եվրոպական շուկայի մասին, այն պաշտպանված է և փակ այլ երկրներից ներմուծման համար»,- ասել է ընդդիմության առաջնորդը։
Գովազդ A3
Գովազդ A4
Քոչարյանն ընդգծել է, որ առևտրի եվրոպական մոդելը պահանջում է զգալի ծախսեր և սուբսիդիաներ, որոնք, նրա կարծիքով, Հայաստանն ի վիճակի չէ ապահովել։
«Եվրոպական շուկան շատ ծանր շուկա է։ Դրանում ամրապնդվելու համար անհրաժեշտ են հսկայական ներդրումներ երկրի ներսում, և սուբսիդավորման մակարդակը պետք է բոլորովին այլ լինի։ Հայաստանը նման փողեր չունի»,- նշել է վարչապետի թեկնածուն։
Նա որպես օրինակ է բերել Նիդերլանդների ծաղկային ինդուստրիան՝ նշելով, որ այս ոլորտում Հայաստանի հետ համեմատությունն անընդունելի է։
«Նիդերլանդները ծաղիկների խոշորագույն արտահանողն է Եվրոպայում։ Նրանք աշխատում են որպես կենտրոն։ Ծաղիկների հիմնական ծավալները նրանք ներմուծում են Քենիայից, Էկվադորից և Կոլումբիայից, որտեղ իդեալական կլիմայական պայմաններ են։ Այնտեղ կլոր տարի գրեթե հավերժական գարուն է։ Իսկ Հայաստանն այլ կլիմայական պայմաններ ունի. դու չես կարող մրցակցել գնի առումով»,- պարզաբանել է քաղաքական գործիչը։
Նա նշել է, որ տարբերությունը փոխհատուցելու ցանկացած փորձ մշտական պետական ծախսեր կպահանջի։
«Դա նշանակում է մշտական սուբսիդավորում՝ սուբսիդավորել, սուբսիդավորել և էլի մեկ անգամ սուբսիդավորել։ Բայց որտեղի՞ց վերցնել այդ փողերը»,- ասել է Հայաստանի երկրորդ նախագահը։
Քոչարյանը հայտարարել է, որ նման քաղաքականությունը, իր կարծիքով, հանգեցնում է բյուջեի վրա ծանրաբեռնվածության մեծացմանը և այլ ոլորտների ֆինանսավորման հնարավորությունների կրճատմանը։
«Հայաստանի բյուջեն կարող էր ուղղվել այլ կարիքների, օրինակ՝ թոշակների բարձրացմանը։ Բայց հիմա նոր ծախսեր են հայտնվում գյուղատնտեսության ոլորտում։ Հանուն ինչի՞ է այս ամենը։ Հանուն աթոռը պահպանելո՞ւ», — նշել է ընդդիմության առաջնորդը։
Նա միաժամանակ քննադատել է այն գաղափարը, թե արտաքին քաղաքական կուրսը կարող է արդարացվել տնտեսական խոստումներով։
«Եթե պատասխանն է՝ «հանուն խաղաղության» կամ «հանուն ինքնիշխանության», ապա ի՞նչ կապ ունի այստեղ ծաղիկների կամ լոլիկի արտահանումը։ Դա խաղաղության հետ կապ չունի»,- պարզաբանել է քաղաքական գործիչը։
Նա զգուշացրել է նաև գյուղատնտեսության համար Թուրքիայի հետ սահմանների բացման հնարավոր հետևանքների մասին։
«Թուրքիայի հետ սահմանը բացվելու դեպքում գյուղատնտեսությունը կբախվի լրջագույն խնդիրների, որովհետև մեր շուկաները մրցակցային են, իսկ Ռուսաստանի հետ՝ փոխլրացնող»,- ընդգծել է ընդդիմության առաջնորդը։
Մեկնաբանելով քաղաքական իրավիճակը և Հայաստանի արտաքին քաղաքական կուրսը՝ Քոչարյանը հայտարարել է, որ երկիրը, իր կարծիքով, հայտնվել է Ռուսաստանի և Արևմուտքի միջև վտանգավոր աշխարհաքաղաքական փոխդասավորության մեջ։
«Սա հերթական մեծ փուլն է։ Ըստ էության, ընթանում է Եվրոպայի սառը պատերազմը Ռուսաստանի հետ, թեժ պատերազմը՝ Ուկրաինայում, և այս համատեքստում Հայաստանը կանգնել է Ռուսաստանի հակառակորդների հետ ինտեգրման ճանապարհին»,- նշել է քաղաքական գործիչը։
Նա հավելել է, որ նման կուրսը, իր կարծիքով, ընտրվել է միջազգային լեգիտիմություն ստանալու համար։
«Իշխանությունները Հայաստանին ներքաշել են այս իրավիճակի մեջ՝ ընտրությունների լեգիտիմության արտաքին կնիք ստանալու համար։ Արևմուտքը ճանաչում է ընտրությունները լեգիտիմ կամ ոչ լեգիտիմ, և այդ արտաքին գործոնի ներքո է կառուցվել քաղաքականությունը»,- ասել է Հայաստանի երկրորդ նախագահը։
Համեմատելով իրավիճակը Վրաստանի հետ՝ նա նշել է, որ այդ երկիրը մինչ օրս կրում է նախկին կուրսի հետևանքները։
«Սա նույն ճանապարհն է, որով գնում էր Վրաստանը Սահակաշվիլիի օրոք։ Այսօր Վրաստանը դժվարությամբ է դուրս գալիս նրա ժառանգությունից»,- նշել է քաղաքական գործիչը։
Վերջում Քոչարյանը զգուշացրել է Ռուսաստանի և ԵՄ-ի հետ հարաբերություններում Հայաստանի համար հնարավոր հետևանքների մասին։
«Եթե գնանք այս ճանապարհով, Ռուսաստանը նույնպես կարող է վիզային ռեժիմ մտցնել։ Եվ այդ ժամանակ երկու միլիոն հայեր վիզաներով են երթևեկելու։ Ո՞ւր եք տանում երկիրը»,- եզրափակել է նա։
Հղումը՝ News.am
Գովազդ A5
