Տնտեսություն

Հայէկոնոմբանկի Գործադիր տնօրեն Արտակ Առաքելյանը մասնակցեց Հայաստանի բանկերի միության, ՀՀ կենտրոնական բանկի և Գերմանահայկական հիմնադրամի  կազմակերպած «ՓՄՁ ոլորտ․ ազդեցություն և զարգացման մարտահրավերներ» թեմայով համաժողովին: Մայիսի 12-ին Երևանում կայացած համաժողովը նվիրված էր միջազգային կառույցների, ինչպես նաև ՀՀ առևտրային բանկերի միջոցով իրականացվող ծրագրերի ազդեցությանը Հայաստանի փոքր և միջին ձեռնարկատիրության զարգացման վրա։ Համաժողովի շրջանակում տեղի ունեցավ պանելային քննարկում գործադիր և օրենսդիր մարմնի, ինչպես նաև մասնավոր ոլորտի ներկայացուցիչների մասնակցությամբ: Քննարկման նպատակն էր վերհանել ոլորտի արդյունավետ զարգացմանը խոչընդոտող խնդիրները և առաջարկել լուծումներ, որոնք կխթանեն Հայաստանի տնտեսության աճը: «Հաշվի առնելով այն հանգամանքը, որ ՓՄՁ-ները տնտեսության շարժիչ ուժն են՝ Հայէկոնոմբանկն ակտիվորեն ներգրավված է ՓՄՁ վարկավորման ոլորտում: Մենք աշխատում ենք ինչպես պետական ծրագրերի շրջանակում և միջազգային կազմակերպություններից ներգրավված միջոցներով, այնպես էլ սեփական ռեսուրսներով: ՓՄՁ պորտֆելը Հայէկոնոմբանկում կազմում է մոտ 126 մլրդ դրամ, ինչն առևտրայի վարկերի մոտ 60%-ն է, իսկ պետական աջակցությամբ տրամադրվող վարկերի ծավալը գնահատվում է 13 մլրդ դրամ: Այս թվերը, թերևս, խոսում են Բանկի համար ոլորտի կարևորության մասին», — իր ելույթում նշեց Հայէկոնոմբանկի Գործադիր տնօրենը: Անդրադառնալով բիզնեսներին առաջարկվող ֆինանսական գործիքներին՝ Արտակ Առաքելյանը նշեց, որ Հայէկոնոմբանկն առաջարկում է տարատեսակ առևտրային վարկեր և գործընկերության ծրագրեր՝ հնարավորություն տալով ձեռներեցներին ընտրելու բիզնեսի զարգացման առավել հարմար գործիք: Համաժողովը կարևոր հարթակ էր ՓՄՁ ոլորտում պետություն-մասնավոր հատված երկխոսության ամրապնդման և բիզնեսների զարգացմնան համար ավելի բարենպաստ լուծումներ գտնելու համար: Հայէկոնոմբանկը վերահսկվում է ՀՀ Կենտրոնական բանկի կողմից Հղումը՝ News.am

Անկարան և Երևանը ավարտել են երկու երկրների միջև ուղիղ առևտրի մեկնարկի նախապատրաստական աշխատանքները, հայտնել է Թուրքիայի արտաքին գործերի նախարարության պաշտոնական ներկայացուցիչ Օնջու Քեչելին։ «Հայաստանի հետ հարաբերությունների կարգավորման գործընթացի շրջանակներում, որն ընթանում է 2022 թվականից, իրականացվել են վստահության ամրապնդման մի շարք միջոցառումներ։ Այս համատեքստում մեր երկրի և Հայաստանի միջև ուղիղ առևտրի մեկնարկի համար անհրաժեշտ բյուրոկրատական նախապատրաստությունները 2026 թվականի մայիսի 11-ի դրությամբ համարվում են ավարտված», — նշել է դիվանագետը X սոցիալական ցանցում։ Հաղորդվում է նաև, որ երկու երկրների միջև ընդհանուր սահմանի բացման ուղղությամբ անհրաժեշտ տեխնիկական և բյուրոկրատական աշխատանքներ են տարվում։ «Հաշվի առնելով Հարավային Կովկասում կայուն խաղաղություն և բարօրություն հաստատելու պատմական հնարավորությունը՝ Թուրքիան կշարունակի իր ներդրումն ունենալ տնտեսական կապերի զարգացման և տարածաշրջանային համագործակցության խորացման գործում՝ հանուն բոլոր երկրների և ժողովուրդների շահերի», — ասված է թուրք դիվանագետի մեկնաբանության մեջ։ Հղումը։ News.am

Ռուսաստանը Հայաստանին պարզաբանել է Հարավկովկասյան երկաթուղու (ՀԿԵ) կոնցեսիայի վերաբերյալ իրեն մտահոգող բոլոր հարցերը, ՏԱՍՍ-ին տված հարցազրույցում հայտարարել է ՌԴ ԱԳՆ ԱՊՀ երկրների չորրորդ դեպարտամենտի տնօրեն Միխայիլ Կալուգինը։ «Այս թեման (ՀԿԵ-ի կոնցեսիան) մանրամասն քննարկվել է Ռուսաստանի և Հայաստանի առաջնորդների բանակցությունների ընթացքում ապրիլի 1-ին։ Հայկական կողմին մտահոգող բոլոր հարցերի վերաբերյալ տրվել են պարզաբանումներ, ձեռք է բերվել ըմբռնում հետագա աշխատանքի ձևաչափերի շուրջ, այդ թվում՝ տարածաշրջանային հաղորդակցությունների ապաշրջափակման մեջ ռուսական կողմի մասնակցության համատեքստում», — նշել է դիվանագետը։ Նա ընդգծել է, որ Մոսկվայում «ֆիքսել են» ՀՀ վարչապետ Նիկոլ Փաշինյանի հայտարարությունը, թե հանրապետությունում չեն պատրաստվում քննարկել կոնցեսիային առնչվող հարցերը «Ռուսաստանի թիկունքում»։ «Չենք կարող համաձայնել այն պնդման հետ, թե ռուսական ընկերության կողմից հայկական երկաթուղիների կառավարումը որևէ կերպ սահմանափակում է Հայաստանի մրցակցային առավելությունները, ընդհակառակը՝ համոզված ենք, որ այն ստեղծում է դրանք», — նշել է Կալուգինը։ Նրա կարծիքով, «եթե չլիներ ռուսական կողմի քրտնաջան աշխատանքը կոնցեսիայի շրջանակում երկաթուղային ցանցի գործունակության վերականգնման և պահպանման ուղղությամբ, այսօր ավելի դժվար կլիներ խոսել Հայաստանի մասնակցության հեռանկարների մասին Հարավային Կովկասում տրանսպորտային զարկերակների «վերագործարկմանը»»։ ՌԴ ԱԳՆ դեպարտամենտի տնօրենը հիշեցրել է, որ «2008 թվականից ի վեր ներդրումները հայկական երկաթուղիներում կազմել են շուրջ 30 մլրդ ռուբլի, բացի այդ՝ Հայաստանի բյուջե է վճարվել մոտ 15 մլրդ ռուբլի, իսկ ներդրված միջոցների մի մասը ուղղվել է շարժակազմի արդիականացմանը»։ «Ի դեպ, նոր գնացքներից մեկը՝ Երևան — Գյումրի երթուղու համար, փորձարկել է հենց վարչապետը՝ հայկական ղեկավարության այլ ներկայացուցիչների հետ միասին», — նշել է Կալուգինը։ Նա վստահ է, որ ՀԿԵ-ն մնում է հանրապետության ամենախոշոր գործատուներից մեկը՝ ապահովելով շուրջ 2,5 հազար աշխատատեղ»։ «Մեր կողմից տեսնում ենք համատեղ, փոխշահավետ աշխատանքի մեծ ներուժ, որի երաշխիքներից մեկը հայկական երկաթուղային ցանցի արդյունավետ կառավարումն է ռուս մասնագետների կողմից», — նշել է դիվանագետը: Հղումը՝ News.am

Բնապահպանության և ընդերքի տեսչական մարմնի աշխատակիցները ստուգում են իրականացրել Երևանում գործող մոլիբդենի խտանյութի վերամշակմամբ զբաղվող «ՄԱՔՈՒՐ ԵՐԿԱԹԻ ԳՈՐԾԱՐԱՆ» ԲԲԸ-ում։ Այս մասին հայտնում են տեսչական մարմնից: Պարզվել է, որ Ընկերությունը գործունեության ընթացքում թրծման տեղամասի բազմահատակ վառարանը շահագործել է առանց անշարժ աղբյուրներից վնասակար նյութեր մթնոլորտային օդ արտանետման թույլտվության։ Տեսչական մարմնի Երևանի տարածքային բաժնի պետի որոշմամբ թրծման տեղամասի բազմահատակ վառարանի ապօրինի շահագործումը կասեցվել է։ Ընկերության տնօրենի նկատմամբ նշանակվել է վարչական տուգանք՝ 450.000 ՀՀ դրամ, ներկայացվել է նաև շրջակա միջավայրին հասցված վնասի փոխհատուցման պահանջ՝ 16.961.440 ՀՀ դրամի չափով։ Հղումը՝ Newday.am

Վրաստանից Հայաստան եկող գազատարի 5,5– կիլոմետրանոց հատվածը տեղափոխելու մասին որոշումն ընդունվել է գործող խողովակաշարի տեխնիկական անբավարար վիճակի պատճառով: Այս մասին Sputnik Արմենիայի պատասխան գրավոր հարցմանն ի պատասխան հայտնել են ՀՀ տարածքային կառավարման և ենթակառուցվածքների նախարարությունից։ Ավելի վաղ վրացական կողմը հայտնել էր, որ Հայաստանի խնդրանքով կտեղափոխվի Վրաստանն ու Հայաստանը միացնող գազատարի 5,5– կիլոմետրանոց հատվածը։ Դրանից հետո ՀՀ վարչապետի աշխատակազմի ղեկավար Արայիկ Հարությունյանը հայտարարել էր, որ տեղափոխման որոշումը կարող է կապված լինել Հայաստանի ու Վրաստանի միջև սահմանազատման գործընթացի հետ։ Գերատեսչությունում վստահեցրել են, որ մայր գազատարը ռազմավարական և կենսական նշանակություն ունի Հայաստանի համար, քանի որ ապահովում է Ռուսաստանից ներկրվող բնական գազի հիմնական ծավալի մուտքերի ավելի քան 80 տոկոսը: «Տեղափոխման նպատակը Հայաստանի հուսալի և անխափան գազամատակարարման ապահովումն է։ Նոր կառուցվող մայրուղային գազատարը կնպաստի Հայաստանի գազամատակարարման հուսալիության բարձրացմանը՝ վթարների և մատակարարումների խափանումների ռիսկերի նվազեցման հաշվին», — պարզաբանել են գերատեսչությունում։ Նախարարությունից նաև հավաստիացրել են, որ վրացական կողմում գազատարի կառուցման աշխատանքների ընթացքում Հայաստանում գազամատակարարման ընդհատումների վտանգ չկա: Գործընթացն արդեն սկսվել է, աշխատանքների ավարտը նախատեսված է մինչև 2027 թվականի տարեվերջ։ Նախագիծը ֆինանսավորվում և իրականացվում է վրացական կողմի հաշվին: Հարցը քննարկվել և համաձայնեցվել է Հայաստանի և Վրաստանի միջև տնտեսական համագործակցության միջկառավարական հանձնաժողովի աշխատանքների շրջանակում: Հղումը՝ Newday.am

«Ուժեղ Հայաստան» կուսակցության անդամ, ՀԷՑ նախկին տնօրենի պաշտոնակատար Դավիթ Ղազինյանը լրագրողների հետ զրույցում հայտարարել է, որ իշխանությունների գործողությունները հերթական դրսևորումն են պետության վերաբերմունքի՝ մասնավոր բիզնեսի հանդեպ։ Նրա խոսքով՝ Սամվել Կարապետյանը որևէ խնդիր չունի իր սեփականությունը պաշտպանելու հարցում, սակայն այս փուլում առաջնայինը երկրի ընդհանուր իրավիճակն է, ոչ թե անձնական կամ բիզնես շահերը։ Ղազինյանը նշել է, որ ստեղծված պայմաններում ճիշտ չի համարում քննարկումները միայն ՀԷՑ-ի կամ հնարավոր բանակցությունների շուրջ կենտրոնացնելը։ Նա նաև հաստատել է տեղեկությունը, ըստ որի՝ ՀՀ կառավարությունը ՀԷՑ-ը ձեռք բերելու նպատակով բաժնետերերին՝ Կարապետյանի ընտանիքին, առաջարկել է 380 հազար դոլար։ Ղազինյանի գնահատմամբ՝ այդ առաջարկն անիրատեսական է և որևէ տրամաբանական հիմնավորում չունի։ Նրա խոսքով՝ նման պայմաններին որևէ ողջամիտ մարդ համաձայնություն չէր տա։ «Այդ առաջարկը որևէ բանական, տրամաբանություն ունեցող մարդ չի ընդունի, հակառակը՝ ներկայացնողին պետք է ուղարկել համապատասխան մասնագետի մոտ»,- նշել է նա: Հվումը՝ Hraparak.am  

Կառավարությունն իր այսօրվա՝ մայիսի 7–ի նիստում ընդունել է որոշում, որով կապահովվի Արաքս գետի ողողահունում ավազի հանքավայրի և Արմավիր ջրանցքի վրա պարզարանի կառուցման համար անհրաժեշտ տիպային նախագծերի նախագծանախահաշվային փաստաթղթերի պատրաստումը և փորձաքննությունների իրականացումը: Տիպային նախագծերի առկայությունը և վերջիններիս համապատասխան ավազի արդյունահանման աշխատանքների իրականացումը հնարավորություն կտա ձևավորել շինարարական ավազի պահանջարկի բավարարման աղբյուր՝ միաժամանակ ապահովելով Արաքս գետի հունի սահմանային կայունությունը, ինչպես նաև կանխարգելելով ոռոգելի հողատարածքների ավազակալումը և արդյունավետորեն կառավարելով շրջակա միջավայրի պահպանության ռիսկերը: Հողերի բերրիության պահպանմանն ու ջրային համակարգերի անխափան աշխատանքին զուգահեռ, նախագծի իրականացումը կունենա սոցիալ-տնտեսական դրական ազդեցություն՝ հիմնված գիտականորեն հիմնավորված տեխնիկական լուծումների և տիպային նախագծերի ներդրման վրա: Ըստ հիմնավորման, վարչապետի հանձնարարականի կատարման անհրաժեշտությունից ելնելով՝ նախատեսվել է ավազի արդյունահանման ոլորտի համալիր կարգավորման նպատակով ձեռնարկել համապատասխան միջոցառումներ, այդ թվում՝ ավազի արդյունահանման համար համապատասխան նստեցման կայանի (պարզարանի) կառուցում։ Վերջինիս նպատակն է ունենալ գիտականորեն հիմնավորված և տեխնիկապես հագեցած գետաողողատային տիպի հանքավայրերի շահագործման տիպային նախագծի օրինակելի ձև, որը թույլ կտա Արաքս գետի ողողահունում ավազի արդյունահանումը իրականացնել տիպային նախագծին համապատասխան: Հղումը՝ News.am

Ներկայիս իրավիճակի հետ կապված, որը պայմանավորված է Ռուսաստանի Դաշնության տարածքում մաքսային ձևակերպման շրջանակում առանձին ապրանքների կատեգորիաների նկատմամբ վերահսկողության լրացուցիչ ընթացակարգերի կիրառմամբ, Wildberries ընկերությունը (ԻՄՎԲԱՄ ՍՊԸ) ներկայացնում է պարզաբանում։ Ընկերությունը գտնվում է գործընկերների և համապատասխան կառույցների հետ մշտական երկխոսության մեջ և ուշադիր հետևում է իրավիճակի զարգացմանը։ Այս աշխատանքի շրջանակում կազմակերպվել է հանդիպում հայ վաճառողների հետ, որին մասնակցել են ավելի քան 50 ձեռնարկատերեր։ Ընկերության ներկայացուցիչները գործընկերների հետ քննարկել են առաջացող հարցերը, լսել հետադարձ առաջարկությունները և շարունակում են համատեղ մշակել հնարավոր լուծումները։ Նաև նշենք, որ ապրիլի 20-ից Ռուսաստանի Դաշնությունում փոփոխվել են մաքսային ձևակերպման կանոնները։ Նոր պահանջների պահպանման համար վաճառողներից պահանջվել են լրացուցիչ փաստաթղթեր՝ անհրաժեշտ թարմացված ընթացակարգերի շրջանակում։ Միաժամանակ, Ռուսաստանի Դաշնությունում պահեստներում արդեն առկա ապրանքները շարունակում են իրացվել սովորական ռեժիմով, իսկ վաճառողները պահպանում են Հայաստանի ներքին շուկայում գործելու հնարավորությունը։ Բոլոր հարցերը քննարկվում են սահմանված կարգով՝ համապատասխան կողմերի մասնակցությամբ։ Ընկերությունը հույս ունի իրավիճակի փուլային կարգավորման վրա և կտեղեկացնի էական փոփոխությունների մասին դրանց առաջացմանը զուգընթաց։ Հղումը՝ B24.am