Author name: Sose 2

Ալիևը Կովսականում (նախկին Զանգելան) հայտարարել է, որ ՀՀ-ում որոշ քաղաքական ուժեր ապրում են Ադրբեջանի նկատմամբ ատելության զգացումով: Այս մասին ֆեյսբուքյան իր էջում գրել է «Պատիվ ունեմ» խմբակցության քարտուղար Տիգրան Աբրահամյանը։ «Ատելության, անհանդուրժողականության և ագրեսիայի մասին խոսում է մի երկիր, որը ցեղասպանություն է իրականացրել Արցախում ապրող հայերի նկատմամբ, շանտաժով ու սպառնալիքներով զիջումներ կորզել։ Եթե Ալիևի խոսքը առկա իրողություններին հարմարվելու և ծնկի գալու մասին է, ապա, այո՛, Հայաստանում կան ուժեր ու մարդիկ, որոնք չեն ընդունում Ալիև-Փաշինյան տանդեմի դաշինքն ու համատեղ ջանքերը և պայքարում են մեր ժողովրդի դեմ իրականացվող թշնամական գործողությունները կանխելու համար»,-գրել է  նա։ Հղումը՝ Newday.am

Հայաստանը Եվրոպական Միության անդամակցություն չի ցանկանում։ Այս մասին գրել է միջազգայնագետ Սուրեն Սարգսյանը։ «Դա շատ լավ գիտեն թե՛ Մոսկվայում, թե՛ Բրյուսելում, թե՛ Վաշինգտոնում, և թե՛ Երևանում։ Ավելին՝ դա չեն ցանկանում ոչ Մոսկվայում, ոչ Բրյուսելում, ոչ Վաշինգտոնում, և առավել ևս՝ ոչ Երևանում։ Եթե Հայաստանը նման մտադրություն ունենար, պատմական հնարավորություն ուներ ընդամենը մեկ շաբաթ առաջ այդ մասին հայտարարելու և տեղում Եվրոպական Միության աջակցությունը հայցելու համար։ Սակայն, քանի որ դա տեղի չունեցավ, կարելի է ենթադրել, որ այս փուլում թեմայի շուրջ շահարկումները հիմնականում ունեն պոպուլիստական և նախընտրական բնույթ»,-գրել է  նա։ Հղումը՝ Newday.am

«Ուժեղ Հայաստան» կուսակցության անդամ Նարեկ Կարապետյանը Գորիսում հանրահավաքի ժամանակ արձագանքել է պաշտպանության նախարար Սուրեն Պապիկյանի հայտարարությանը։ «Պարո′ն Պապիկյան, խոսում ես բանակում ծառայելուց։ Սամվել Կարապետյանը ծառայել է բանակին, ամենամեծ աջակցությունն է տվել հայկական բանակին, քո ղեկավարը չի ծառայել բանակում, իսկ ապրիլյան պատերազմին մասնակցել է մայիսին։ Նիկոլ Փաշինյանը չի ծառայել, մեր ղեկավարը ծառայել է»,– ասել է Նարեկ Կարապետյանը։ Հղումը՝ Hraparak.am  

Ջերմ շնորհավորանքներ Պետեր Մադյարին՝ Հունգարիայի վարչապետ ընտրվելու կապակցությամբ։ Այս մասին X-ի իր էջում գրել է վարչապետ Նիկոլ Փաշինյանը։ «Մաղթում եմ հաջողություններ Հունգարիայում բարեկեցություն և զարգացում ապահովելու կարևոր առաքելությունում։ Մենք պատրաստ ենք խորացնել Հայաստանի և Հունգարիայի միջև բարեկամական և փոխշահավետ հարաբերությունները»,- գրել է նա։ Հղումը՝ News.am

Ռուսաստանի նախագահ Վլադիմիր Պուտինը հայտնել է, որ Հաղթանակի օրը Մոսկվա ժամանած օտարերկրյա առաջնորդները ցուցաբերել են անձնական քաջություն, փոխանցել է «Петербургский дневник»-ը։ Նա միաժամանակ նշել է, որ առանձնապես ոչինչ չի տեսնում այն բանում, որ Հայաստանի վարչապետ Նիկոլ Փաշինյանը հրաժարվել է Հաղթանակի օրը գալ Մոսկվա։ Ռուսաստանը նաև կաջակցի այն ամենին, ինչը ձեռնտու է հայ ժողովրդին, սակայն Երևանի՝ ԵՄ-ին միանալու ծրագրերը պահանջում են հատուկ քննարկում, հայտնել է Վլադիմիր Պուտինը։ Հայաստանի իշխանությունները կարող էին հանրաքվե անցկացնել ԵՄ-ին անդամակցելու հարցով, և, եթե ժողովուրդը դրան աջակցի, Ռուսաստանը կարող էր սկսել «քաղաքակիրթ ամուսնալուծության» գործընթացը, նշել է Վլադիմիր Պուտինը։ Նա հիշեցրել է, որ Ուկրաինայի դեպքում ևս ամեն ինչ սկսվեց եվրաինտեգրման հարցից։ Հայաստանի եվրաինտեգրման հարցը լիովին կարելի էր բարձրացնել ԵԱՏՄ հերթական գագաթաժողովում, հայտնել է Պուտինը։ Հղումը՝ News.am