Քաղաքականություն

Հղումը՝ News.am

Հղումը՝ News.am

Անցած 5 տարիների ընթացքում գործող վարչապետ Նիկոլ Փաշինյանը 180 աստիճանով փոխել է իր բոլոր մոտեցումները։ Այս մասին այսօր՝ մայիսի 16-ին, Արարատում հայտարարել է Հայաստանի երկրորդ նախագահ Ռոբերտ Քոչարյանը։ Նա հիշեցրել է, որ 2021 թվականին՝ իր նախընտրական քարոզարշավի շրջանակներում, Հայաստանի վարչապետ Նիկոլ Փաշինյանը խոստանում էր, որ ընտրվելու դեպքում դեօկուպացնելու է Շուշին ու Հադրութը և պահպանելու է Լաչինի միջանցքի նկատմամբ վերահսկողությունը։ 5 տարի անց Արցախը կորսված է, իսկ վարչապետը հայտարարում է, թե Արցախյան շարժումը սխալ էր, որ Հայաստանն Արցախի հետ որևէ առնչություն չունի, որ այս բոլոր տարիներին այնտեղ ոչինչ չի կառուցվել, որ Հայաստանի պատմությունը ենթակա է վերանայման, իսկ Հայոց ցեղասպանության հարցը պետք է լրացուցիչ ուսումնասիրվի։ Ավելին, այսօր իշխող ուժը նույնիսկ չի էլ հանդգնում խոսել ժողովրդավարության մասին, քանի որ այն պարզապես գոյություն չունի։ Ողջ պատմության ընթացքում Հայաստանում քաղբանտարկյալների նման քանակ երբեք չի եղել, ինչպես հիմա է։ «Սա 180 աստիճանի փոփոխություն է ամեն ինչում։ Էն ժամանակ մարդիկ կարող էին ասել՝ լավ, բա էս հարիֆը ի՞նչ անի, հիմա պատերազմ է, հիմա փորձ չունի․․․։ Բայց հիմա Նիկոլ Փաշինյանի համար ձայն տվողը ինքն իրեն հարց պիտի տա, թե ինչո՞ւ է ընտրում Նիկոլ Փաշինյանին»,- հարց է հնչեցրել Քոչարյանը։ Նա նշել է, որ իրեն ապշեցնում է իշխող ուժի աներեսությունը, որը երկրի գլխին բերած այսքան աղետներից հետո կարող է գնալ և մարդկանց լուսավոր ապագա խոստանալ։ «Եթե մի քիչ ամոթի զգացողություն ունենար, կհավաքեր իր կաբինետի իրերը և կհեռանար»,- հայտարարել է Քոչարյանը։ Նա նշել է, որ այսօր ընտրողները չպետք է Փաշինյանին երրորդ շանս տան, քանի որ այդ ընտրության գինը կարող են դառնալ Սյունիքն ու նույնիսկ Սևանը։ Քոչարյանը վստահ է, որ Փաշինյանը պատրաստ է հետագա տարածքային զիջումների, և նրա քաղաքականությունը, ըստ էության, պատերազմի հրավեր է։ «Երկու օր առաջ ասացի [Փաշինյանին] «համբալ», ու դա շրջանառության մեջ մտավ։ Ահավոր նեղացան։ Բայց հեչ չեն նեղացել մեկ արտահայտությունից, որ ասել եմ՝ «Ալիևի տուզիկն» է։ Չի նեղացել։ Կապ չունի, թե էդ մարդուն դու ինչ ես ասում, «Ալիև» բառը կպցրու՝ ամեն ինչ մարսելու է։ Ամոթ է։ Խոսքն այստեղ պետք է գնա, թե արդյոք մենք պատրաստ ենք ազգովի պայքարել արժանապատվության համար, թե՞ ոչ»,- հայտարարել է նա։ Հղումը՝ News.am

ԱԺ «Հայաստան» խմբակցության պատգամավոր Արթուր Խաչատրյանի ֆեյսբուքյան գրառումը: Սիրելի հայրենակիցներ, Ապրիլի 30-ին հարցում էի ուղարկել կառավարություն՝ մարնամասն տեղեկություններ ստանալու համար, թե Հայաստանի դեմ մղվող «հիբրիդային» պատերազմում հաղթելու համար Եվրամիության տրամադրած (կամ տրամադրելիք) 12 միլիոն եվրոն կոնկրետ ինչի՞ վրա է ծախսվել (կամ պիտի ծախսվի)։ Ստացել եմ ԱԳՆ պատասխանը՝ ՏԵՂՅԱԿ ՉԵՆՔ։ Ինչ-որ մի բան տրամադրվել է Կենտրոնական ընտրական հանձնաժողովի, մնացածը` ՀԿ-ներ, անկախ լրագրողներ և այլն: Ինչ է ստացվում։ Հայաստանը փող է խնդրում եվրոպացիներից «2026 թվականին կայանալիք խորհրդարանի ընտրությանն ընդառաջ նկատվող հիբրիդային սպառնալիքների դեմ պայքարելու համար»։ Եվրոպացիները սիրահոժար տալիս են։ Բայց դե ո՞ւմ, ինչքա՞ն, ինչի՞ համար․․․․ Կառավարությունը չգիտի, իրենց չի հետաքրքրում։ Բա չեք ուզո՞ւմ իմանալ հիբրիդային պատերազմի դեմ Հայաստանում ովքե՞ր և ինչպե՞ս են պայքարում։ Հղումը՝ Aravot.am

Հայաստանի վարչապետ Նիկոլ Փաշինյանի՝ Եվրոպական միության հետ մերձեցմանն ուղղված քայլերն ու որոշումները հանգեցնում են հանրապետությունում հասարակության պառակտմանը, ինչը հղի է մեծ խնդիրներով։ Այսպիսի կարծիք է հայտնել Ռուսաստանի Պետդումայի նախագահ Վյաչեսլավ Վոլոդինը, հաղորդում է «Ինտերֆաքսը»: «Այս ամենը հանգեցնում է հասարակության պառակտմանը: Եվ սա, թերևս, ամենամեծ կորուստն է, որը հնարավոր է Հայաստանում՝ միասնության կորուստը»,- շաբաթ օրն իր X ալիքում գրել է Վոլոդինը՝ մեկնաբանելով այն հարցը, թե «ինչպես կարող են անդրադառնալ վարչապետ Նիկոլ Փաշինյանի քայլերն ու հայտարարությունները Հայաստանի համար»։ ՌԴ Պետդումայի նախագահը նշել է, որ հենց «բազմաթիվ երկրներում հենց դրանից են սկսվել մեծ խնդիրները»։ «Եվ այստեղ դարձյալ ակամա զուգահեռներ են առաջանում Ուկրաինայի և այնտեղ 2014 թվականին տեղի ունեցած իրադարձությունների հետ։ Կարելի է հիշել նաև Մերձբալթյան երկրները, որոնք ձգտում էին դառնալ Եվրոպական միության մաս, սակայն, ինչպես ցույց տվեց ժամանակը, նրանք դրանից ավելի երջանիկ չդարձան»,- գրել է Վոլոդինը։ Բացի այդ, նա թվեր է ներկայացրել, որոնք, նրա խոսքով, «խոսում են իրենք իրենց փոխարեն»։ Այսպիսով՝ Եվրամիությանը հնարավոր անդամակցության մասին խոսակցությունների ֆոնին, «մեր երկրի հետ ապրանքաշրջանառությունը 2025 թվականին կտրուկ նվազել է 45,4%-ով, և այս բացասական միտումը պահպանվում է»,- նշել է նա։ Վոլոդինի պնդմամբ՝ «Հայաստանում աշխատող և այնտեղ բիզնես հիմնած Ռուսաստանի քաղաքացիները սկսել են փակել ձեռնարկությունները և հեռանալ, ինչը կապված է ստեղծված անորոշության և ապագայում հնարավոր խնդիրների հետ»։ «Փորձագետների գնահատականներով՝ ԵԱՏՄ-ից Հայաստանի դուրս գալը կարող է երկրին արժենալ ՀՆԱ-ի 15-20%-ի կորուստ, ինչը կազմում է առնվազն 5 միլիարդ դոլար»,- նշել է Պետդումայի նախագահը։ Նրա կարծիքով՝ «սա միայն այն է, ինչ երևում է արտաքինից»։ «Կորուստներն ավելի շատ կլինեն, և դրանցից ոչ բոլորն են առնչվում ֆինանսներին։ Արդեն իսկ տեսնում ենք պատմությունը վերախմբագրելու, ազգային ու ավանդական հիմքերը խարխլելու փորձեր։ Հայ ժողովրդին պարտադրվում են արևմտյան լիբերալ արժեքներ, ընթանում են եկեղեցու դեմ հալածանքներ»,- հավելել է Վոլոդինը։ «Ուղու ընտրությունն առաջին հերթին ժողովրդի կամքի վրա հիմնված ընտրություն է։ Ինչպիսի պաշտոն էլ զբաղեցնի քաղաքական գործիչը, նա պետք է առաջնորդվի հենց դրանով»,- գրել է ՌԴ Պետդումայի նախագահը։ Հղումը՝ News.am