Հայաստան-Ռուսաստան հարաբերությունները լայն օրակարգ ունեն. եթե այդ հարաբերությունների ողջ սպեկտրը հաշվի առնենք, այո, որոշ տեղերում կարող են հարցեր լինել, բայց ընդհանուր առմամբ, ճգնաժամ չեմ տեսնում այդ հարաբերություններում։ Այս մասին այսօր՝ մայիսի 9-ին, «Հաղթանակ» զբոսայգում լրագրողների հետ զրույցում հայտարարել է Հայաստանի Անվտանգության խորհրդի քարտուղար Արմեն Գրիգորյանը։ Մեկնաբանելով Մոսկվայից հնչած քննադատությունը՝ կապված Վլադիմիր Զելենսկուն հարթակ տրամադրելու հետ՝ Եվրոպական քաղաքական համայնքի գագաթնաժողովի շրջանակում, Գրիգորյանը ընդգծեց, որ Հայաստանը պարզապես հետևել է միջոցառման սահմանված միջազգային ձևաչափին. «Ես այդտեղ որևէ խնդիր չեմ տեսնում, որ մենք Հայաստանում միջազգային մակարդակի համաժողով ենք կազմակերպում և հետևում ենք այդ համաժողովի ֆորմատին համապատասխան բոլոր գործընթացներին»,–ասաց Գրիգորյանը։ Դիտարկմանը, որ Զելենսկին Երևանում հայտարարել է, որ Մոսկվայում շքերթի ժամանակ կարող են ուկրաինական ԱԹՍ–ներ թռչել, Արմեն Գրիգորյանն ասաց. «Ես ծանոթ չեմ այդպիսի հայտարարությունների, բայց եկեք նաև հաշվի առնենք, որ մենք չենք կարող հետևել, ով ինչ հայտարարություն է անում։ Ես կարծում եմ կարևոր է, թե Հայաստանը ինչպիսի հայտարարություններ է անում և Հայաստանը ինչպիսի դիրքորոշումներ է հայտնում»։ Ինչ վերաբերում է ՀՀ վարչապետ Նիկոլ Փաշինյանի հայտարարությանը, թե ղարաբաղյան շարժումը ճակատագրական սխալ է եղել, ԱԽ քարտուղարն ասաց. «Ճիշտ կլինի վարչապետին այդ հարցերը տաք, բայց ընդհանուր առմամբ այն իրականությունը, որ մենք այսօր ունենք, ցույց է տալիս հենց վարչապետի հայտարարության տրամաբանությունը, որովհետև եթե այդ ճանապարհը, որ մենք ընտրել ենք, արդյունավետ լիներ, այսօր մենք այս արդյունքը չէինք ունենա։ Մենք եկել հասել ենք էս արդյունքի և տեսել ենք այն իրականությունը, որ ունենք, և ըստ դրա եզրահանգումներ ենք կատարել»։ Հղումը՝ News.am
