Ըստ հանրակրթական դպրոցների տնօրենների նշանակման նոր կարգի` տնօրեն նշանակելուց հետո տվյալ մարզպետը կամ ԿԳՄՍ նախարարը պետք է նշանակի նաեւ դպրոցի վարչատնտեսական մասի համակարգող։ Այսինքն, ըստ էության, դպրոցը 2 տնօրեն է ունենում․ մեկը տնտեսական հարցերն ու բյուջեն է տնօրինում, մյուսը` կրթական ծրագրերն ու բովանդակությունը: Ապրիլի 17-ին Տավուշի մարզպետ Հայկ Ղալումյանին հարցում եմ արել․ «Տավուշի մարզի ո՞ր դպրոցների տնօրեններն են նոր կարգով նշանակվել, այդ դպրոցներում նշանակվե՞լ է վարչատնտեսական մասի համակարգող»։ Մարզպետի աշխատակազմից հայտնել են․ «Տավուշի մարզի դպրոցներում նոր կարգով նշանակված տնօրենների թիվը 21-ն է (Դեբեդավան, Այգեձոր, Լճկաձոր, Դիլիջանի թիվ 6, Գոշի հիմնական, Ազատամուտ, Գոշի միջնակարգ, Հովք, Բերքաբեր, Ջուջեւան, Տավուշ, Դիլիջանի թիվ 2, Դիլիջանի թիվ 4, Իջեւանի թիվ 1, Իջեւանի թիվ 5, Կայանավան, Հաղթանակ, Այգեհովիտ, Բաղանիս, Սեւքար, Զորական), իսկ վարչատնտեսական մասի համակարգող ոչ բոլոր դպրոցներում են նշանակված»։ Մարզպետը չի ասել, որ շատ դպրոցներում վարչատնտեսական մասի համակարգողներ նշանակել է, բայց այդ դպրոցներում նոր կարգով տնoրեններ չեն նշանակվել։ Օրինակները բազում են։ 2025թ․ հունիսի 27-ին մարզպետ Ղալումյանը Վոլոդյա Բաբինյանին ազատել է Կիրանցի դպրոցի տնօրենի պաշտոնից: 3 օր անց՝ հունիսի 30-ին, Կիրանց այցելած Նիկոլ Փաշինյանին երկու ձեռքով բարեւած Բաբինյանին նշանակել է Կիրանցի դպրոցի վարչատնտեսական մասի համակարգող։ Դպրոցն ունի ընդամենը 37 աշակերտ, որքանո՞վ էր հրատապ 37 աշակերտ ունեցող դպրոցի վարչատնտեսական մասի համակարգող նշանակելը։ Մարզպետը 2026թ․ մարտի 27-ին Հրայր Պողոսյանին նշանակել է Իջեւանի թիվ 3 հիմնական դպրոցի վարչատնտեսական մասի համակարգող։ Պողոսյանը նախկինում տնօրեն է եղել այդ դպրոցում։ Թիվ 3-ում նոր կարգով տնօրեն չի նշանակվել, սակայն մարզպետը վարչատնտեսական մասի համակարգող է նշանակել դպրոցի նախկին տնօրենին։ Հղումը՝ Hraparak.am
