NA

Ռուսաստանը հնարավոր է միակողմանի կարգով կասեցնի կամ չեղյալ հայտարարի 2013 թվականի դեկտեմբերին ստորագրված՝ Հայաստանին բնական գազի, նավթամթերքի և չմշակված ադամանդների մատակարարման մասին համաձայնագիրը, եթե Երևանը շարունակի ԵՄ-ին անդամակցելու գործընթացը, գրում է «Կոմերսանտ» պարբերականը՝ հղում անելով ՌԴ էներգետիկայի նախարար Սերգեյ Ցիվիլևի՝ Հայաստանի տարածքային կառավարման և ենթակառուցվածքների նախարարությանն ուղղված նամակին։ «Հայաստանի՝ Եվրոպական միության հետ փոխգործակցությունը խորացնելու գործնական քայլերը և Հայաստանի կառավարության հայտարարած ԵՄ-ին անդամակցելու ձգտումը վտանգում են ռուս-հայկական առևտրատնտեսական և ներդրումային համագործակցության հիմնարար բարձր մակարդակի պահպանումն ու զարգացումը, որի հիմքերից մեկը երկկողմ միջազգային պայմանագրերն են»,- ասված է նամակում։ Ըստ Ցիվիլևի՝ Հայաստանի՝ ԵՄ մուտք գործելու փորձերը «չեն համապատասխանում մեր երկրների կառավարությունների և տնտեսավարող սուբյեկտների միջև տասնամյակներ շարունակ հարգանքի և փոխշահավետության հիմքի վրա կառուցված գործընկերության բնույթին և Հայաստանի կենսական կարիքները արտոնյալ հիմունքներով ապահովելու ուղղությամբ բազմիցս ՌԴ ձեռնարկած գործնական քայլերին»։ ՌԴ էներգետիկայի նախարարությունը և Հայաստանի տարածքային կառավարման և ենթակառուցվածքների նախարարությունը մեկնաբանություններ չեն տրամադրել։ Հայաստանի վարչապետ Նիկոլ Փաշինյանի մամուլի քարտուղար Նազելի Բաղդասարյանը ևս չի պատասխանել «Կոմերսանտ»-ի հարցմանը։ 2013 թվականի համաձայնագրով Ռուսաստանն անժամկետ չեղարկել է Հայաստան նավթամթերքի, գազի և ադամանդների մատակարարման արտահանման մաքսատուրքերը։ Սա երկրի՝ ԵԱՏՄ-ին անդամակցելու ճանապարհին ձեռնարկած հերթական քայլն էր, որին այսօր անդամակցում են նաև Ռուսաստանը, Բելառուսը, Ղրղզստանը և Ղազախստանը։ Ըստ համաձայնագրի՝ Մոսկվան Երևանին նավթամթերք և գազ է մատակարարում ինդիկատիվ հաշվեկշիռներով հաստատված ներքին սպառման ծավալներով, ընդ որում՝ արգելված է վերաարտահանումը երրորդ երկրներ։ Փաստաթղթով նախատեսվում է նաև, որ կողմերից որևէ մեկի նախաձեռնությամբ համաձայնագրի գործողությունը դադարեցնելու դեպքում շարունակում են գործել Ռուսաստանին փոխհատուցումներ վճարելու կամ չվճարված գումարները որպես ՌԴ-ի նկատմամբ պետական պարտք ճանաչելու՝ Հայաստանի պարտավորությունները՝ մինչև դրանց լիակատար կատարումը։ Հայաստանը գրեթե ամբողջությամբ բավարարում է իր պահանջարկը ռուսական գազի հաշվին։ 2025 թվականին «Գազպրոմը» երկիր է մատակարարել մոտ 2,7 միլիարդ խորանարդ մետր գազ։ Եվս մոտ 476 միլիոն խորանարդ մետր ստացվում է Իրանից՝ «Գազ էլեկտրաէներգիայի դիմաց» ծրագրի շրջանակում. Հայաստանն Իրան է արտահանում էլեկտրաէներգիա (հիմնականում արտադրված Հրազդանի ՋԷԿ-ում), իսկ Իրանը Հայաստանին՝ բնական գազ՝ 1 խորանարդ մետր գազի դիմաց 3 կՎտժ հարաբերակցությամբ, նշում է պարբերականը։ Մինչև 2,5 միլիարդ խորանարդ մետր ծավալով մատակարարումների երկարաժամկետ պայմանագիրը կնքված է հայկական «Գազպրոմ Արմենիա» ընկերության հետ։ 2013 թվականի պայմանագրին կից լրացուցիչ համաձայնագիրը, որը ստորագրվել է 2019 թվականի վերջին, Հայաստանի համար ռուսական գազի գինը սահմանել է 1000 խորանարդ մետրի դիմաց 165 դոլար, իսկ 2022 թվականին կողմերը պայմանավորվել են այն այս մակարդակում պահպանել ևս տասը տարով։ Ապրիլի սկզբին Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ հանդիպման ժամանակ նշել էր, որ Ռուսաստանը Հայաստանին գազ է վաճառում 1000 խորանարդ մետրի դիմաց 177,5 դոլարով, մինչդեռ Եվրոպայում այն այժմ արժե մոտավորապես 600 դոլար՝ 1000 խորանարդ մետրի դիմաց։ ՌԴ նախագահի մամուլի քարտուղար Դմիտրի Պեսկովը մայիսի 25-ին հայտարարել էր, որ Հայաստանի համար գազի արտոնյալ գինը կդառնա շուկայական, եթե երկիրը լքի ԵԱՏՄ-ն։ Երևանը տարեկան առանց մաքսատուրքի ՌԴ-ից ներմուծում է մոտ 0,9-1 միլիոն տոննա նավթամթերք, գրում է պարբերականը։ Ընդ որում, վերջին տարիներին հանրապետությունը նկատելիորեն դիվերսիֆիկացրել է ներմուծումը։ Օրինակ՝ 2025 թվականին Հայաստանը ներմուծել է մոտ 120,7 հազար տոննա ԱԻ-92 բենզին, որից 50,6 հազար տոննան մատակարարվել է Ռուսաստանից, մնացած մատակարարումները եղել են Ռումինիայից (22 հազար տոննա) և Եգիպտոսից (40 հազար տոննա)։ ԱԻ-95-ի ներմուծումը կազմել է 74,7 հազար տոննա, որից Ռուսաստանից ներկրվել է ընդամենը 6 հազար տոննան, իսկ խոշորագույն մատակարարներ են դարձել Ռումինիան (35 հազար տոննա), Եգիպտոսը և Բուլղարիան։ Հայաստանը նաև վառելիքի գնումներ կատարելու հնարավորություններ ունի ԵՄ-ից, Թուրքիայից և Ադրբեջանից։ Մասնավորապես, Բաքուն 2025 թվականի դեկտեմբերից սկսել է Հայաստան մատակարարել բենզին և դիզվառելիք։ Ադամանդները 2016 թվականին հանվել են համաձայնագրի կարգավորման ոլորտից՝ Հայաստանի՝ ԵԱՏՄ-ի պայմանագրին միանալու կապակցությամբ։ Հայաստան ներմուծվող բոլոր քարերի գրեթե 50%-ը ունի ռուսական ծագում։ Հղումը՝ News.am

NEWS.am-ը զրուցել է միջազգային ճանաչում ունեցող փաստաբան Ռոբերտ Ամստերդամի հետ, որը հանդիսանում է Սամվել Կարապետյանի գլխավոր միջազգային իրավախորհրդատուն։ Պարոն Ամստերդամ, սկսենք վերջին մեղադրանքներից, որոնք իշխող կուսակցության կողմից ուղղվել են անձամբ ձեզ։ Ռուբեն Ռուբինյանը մեղադրել է ձեզ Ջեֆրի Էփսթեյնի հետ կապեր ունենալու մեջ՝ մասնավորապես պնդելով, թե դուք ներկայացրել եք նրան, և այժմ հրապարակել է ձեր ընկերության էլեկտրոնային նամակը, որտեղ հիշատակվում է պարոն Ուեյդի համար առաջարկվող պայմանագրի մասին։ Ի՞նչ կասեք դրա վերաբերյալ։ Ինչպե՞ս կբացատրեք այդ հաղորդակցության համատեքստը։ Իմ պատասխանը՝ եթե օգտագործեմ խոսակցական արտահայտություն, այն է, որ Ռուբենը բթամիտ է, որովհետև նույնիսկ փաստաթուղթը չի կարդացել։ Իշխող կուսակցությունն այնքան է է ուզում մարդկանց սևացնել, որ նույնիսկ չի կարդում այն սուտը, որը տարածում է, որովհետև ներգրավման նամակը բոլորովին այլ անձի համար է։ Այն պարոն Էփսթեյնի համար չէ։ Այն պարոն Ուեյդի համար է, ով Սենեգալից է։ Եթե նրանք թեկուզ նվազագույն ստուգում իրականացնեին, կտեսնեին դա և կհասկանային, որ մենք երբեք անգամ չենք առաջարկել մեր ծառայությունները պարոն Էփսթեյնին։ Պարոն Էփսթեյնը, այն միակ հանդիպման ժամանակ, որ ունեցել եմ աֆրիկացի հաճախորդի հետ կապված, բարձրացրել էր իր համար աշխատելու հնարավորության հարցը, և ես հրաժարվել եմ։ Ես երիտասարդ դուստրեր ունեմ և որևէ հետաքրքրություն չունեի ներգրավվելու որևէ բանի մեջ, որը կապված էր սեռական ոչ պատշաճ վարքի հետ, հատկապես հաշվի առնելով, որ իրավունքի այն շրջանակը, որոնց մասին նա խոսում էր, ես նույնիսկ իրավասու չէի աշխատելու։ Այս մեղադրանքները Նիկոլ Փաշինյանի մեծ ստի արշավի հերթական դրսևորումն են, ով, անկեղծ ասած, թվում է՝ հոգեբանական հավասարակշռություն չունեցող անձ է, որը վերջին շաբաթվա ընթացքում հարձակվում է ոչ միայն իմ և ընդդիմության առաջնորդների, այլ նաև սեփական քաղաքացիների վրա։ Այդ մարդը կարծես չի կարող փողոցով քայլել՝ առանց ընտրողների հետ վիճաբանության մեջ մտնելու՝ կապված Արցախի, եկեղեցու և սեփական ժողովրդի հանդեպ իր դավաճանության հետ։ Նա ծախված մարդ է՝ ադրբեջանցիներին կամ ցանկացած այլ արտաքին ուժի, բայց հաստատ չի պաշտպանում հայ ժողովրդի շահերը։ Պատրաստվո՞ւմ եք իրավական գործընթաց սկսել այդ մեղադրանքների առնրությամբ։ Վստահաբար։ Եթե նրանք ներողություն չխնդրեն, մենք նրանց դատի կտանք։ Ես արդեն նշել եմ 10 միլիոն դոլարի մասին, գուցե ավելին լինի։ Եվ ցանկացած դատավոր, որը տեսնի, որ Ռուբենը կամ մյուսները նույնիսկ չեն կարդացել փաստաթուղթը, որը թափահարում էին, բավական վրդովված կլինի։ Ինձ՝ մի մարդու, ով ներկայացնում է կարևոր կրոնական հաստատություններ, կապել պարոն Էփսթեյնի հետ՝ ուղղակի խայտառակություն է։ Առավել ևս՝ առանց որևէ հետազոտության, այն դեպքում, երբ փաստաթղթերից ակնհայտ է, որ ես որևէ հետաքրքրություն չեմ ունեցել պարոն Էփսթեյնին ներկայացնելու հարցում։ Սա պետք է ամոթ լինի ցանկացած կառավարության համար։ Բայց կարծում եմ՝ Փաշինյանի կառավարությունն արդեն ամոթի սահմաններից դուրս է։ Նրանք մի խումբ են, որը հավատում է, թե կարող է ստելով վերընտրվել՝ հիմնվելով Արևմուտքի աջակցության վրա՝ հայ ժողովրդին վաճառելու դիմաց։ Ինչո՞ւ, ըստ ձեզ, առաջ քաշվեցին այդ մեղադրանքները։ Ակնհայտ է, որ մենք արդյունավետ ենք գործում։ Նրանք մեզ վրա չէին հարձակվի, եթե չզգային, որ մենք արդյունավետորեն ներկայացնում ենք ճշմարտությունը հայ ժողովրդին՝ Սամվել Կարապետյանի, նրա համոզմունքների և այն փաստի մասին, որ պարոն Կարապետյանը քաղաքական պաշտոնի որևէ հավակնություն չուներ, մինչև Փաշինյանը չսկսեց այս խելահեղ հարձակումները եկեղեցու և եկեղեցու ղեկավարության դեմ։ Այդ հարձակումները փաստագրված են։ Այսպիսով, յուրաքանչյուր հայ պետք է հասկանա, որ Փաշինյանին տրված ձայնը ձայն է ընդդեմ եկեղեցու, ձայն, որը այդ մարդուն կտա այն իշխանությունը, որը նա կարծում է, թե ունի՝ հեռացնելու եկեղեցու առաջնորդին և վերակառուցելու եկեղեցին կանոնական իրավունքին հակասող ձևով։ Ինչպե՞ս եք գնահատում նախընտրական մթնոլորտը։ Վերջին շաբաթներին քաղաքական հռետորաբանությունը զգալիորեն սրվել է, այդ թվում՝ Սամվել Կարապետյանի և նրա կուսակցության դեմ ուղղված սպառնալիքները վարչապետ Նիկոլ Փաշինյանի կողմից։ Պարոն Փաշինյանը հուսահատ մարդ է։ Նա մարդ է, որն այնքան հաճախ է փոխել իր հարթակն ու քաղաքականությունը, որ նրա վարքագծի պատմությանը նայելը պարզապես ամոթալի է նրա համար։ Կարծում եմ՝ մարդիկ հասկանում են, որ նա իրականում վաճառել է Հայաստանը ամենաբարձր գնորդին։ Նույնիսկ նրա հայտարարություններն են իրար հակասում։ Երեք շաբաթ առաջ նա ասում էր, որ ռուս-հայկական հարաբերությունները երբեք այսքան լավ չեն եղել։ Հետո նա հրավիրեց պարոն Զելենսկուն Հայաստան, և դրա արդյունքում պարոն Պուտինը սկսեց սխալ գործողություններ իրականացնել՝ սպառնալով հայ ժողովրդին։ Պետք չէ հանճար լինել հասկանալու համար, որ Զելենսկուն Հայաստան բերելը չէր բխում հայ ժողովրդի շահերից, և Ռուսաստանի հետ անհարկի լարվածություն ստեղծելը, հաշվի առնելով տնտեսական կապերը, շատ քիչ իմաստ ունի, եթե նպատակն է Հայաստանը բաց պահել բոլոր երկրների համար։ Ակնհայտ է, որ նպատակը պետք է լինի բազմաբևեռ արտաքին քաղաքականություն՝ լավ հարաբերություններ Միացյալ Նահանգների, ԵՄ-ի և ողջամիտ հարաբերություններ Ռուսաստանի հետ։ Ի՞նչ եք կարծում, ներկայիս միջավայրը թո՞ւյլ է տալիս ազատ և արդար ընտրարշավ։ Անկեղծ ասած, ԵՄ-ի և Ռուսաստանի միջամտությունը չնչին է Փաշինյանի միջամտության համեմատ։ Նա բանտարկում է լրագրողների։ Նա բանտարկում է ընդդիմության առաջնորդներին։ Նա կալանավորել է եկեղեցու կարևոր ներկայացուցիչների։ Նա ավտորիտար ղեկավար է, ով աշխատանքներ է բաժանում նրանց, ում կարծում է, թե իրեն կաջակցեն։ Իրականում հենց Փաշինյանն է ազատ և արդար ընտրությունների գլխավոր խոչընդոտը։ Ռուսական միջամտություն ասելով ի՞նչ նկատի ունեք։ Պարոն Պուտինը բացահայտորեն սպառնացել է տնտեսական պատասխան քայլերով, և ես դա դիտարկում եմ որպես միջամտություն։ Կարծում եմ՝ ցանկացած առաջնորդի հայտարարություն ընտրություններից այսքան կարճ ժամանակ առաջ կարող է դիտվել որպես միջամտություն։ Վերջին շրջանում փորձ է արվում Սամվել Կարապետյանին և «Ուժեղ Հայաստան» դաշինքը ներկայացնել որպես ռուսական շահեր հետապնդողներ։ Նախ արտահոսած փաստաթղթերը պնդում էին, թե Սամվել Կարապետյանը  Ռուսաստանի անվտանգության ծառայության գործակալ է։ Ավելի ուշ իշխող կուսակցության ներկայացուցիչները հարցականի տակ դրեցին Նարեկ Կարապետյանի քաղաքացիությունը։ Այս ամենի վերաբերյալ կա նաև պաշտոնական հետաքննություն։ Ի՞նչ կասե՞ք այդ մասին։ Դրանք բոլորը ստեր են։ Եվ նման պնդումները կավելանան ընտրություններին մոտենալու հետ մեկտեղ, որովհետև Փաշինյանը չի կարող հաղթել պարոն Կարապետյանին։ Ուստի նա կարող է միայն ստել, խաբել և կիրառել անօրինական ու անբարոյական մեթոդներ՝ իր նպատակներին հասնելու համար։ Նա չի հաջողելու։ Այդ զեկույցը, որով փորձում էին Սամվելին կապել Ռուսաստանի անվտանգության ծառայության հետ, ծիծաղելի է։ Փաստաթղթերը ֆոտոշոփված կեղծիքներ են։ Մենք գիտենք, թե ովքեր են դրանք պատրաստել՝ Փաշինյանի հետ կապված թիմ է։ Սա նախընտրական ռուսական ոճի վարքագիծ է, որով զբաղվում է պարոն Փաշինյանը։ Չեմ կարծում, որ Հայաստանում կա քաղաքական գործիչ, ով ավելի շատ է նման Վլադիմիր Պուտինին, քան պարոն Փաշինյանը։ Ի՞նչն է, ըստ ձեզ, նման լուրերի տարածման պատճառը։ Կարծում եմ՝ հուսահատությունը։ Փաշինյանն այնքան հաճախ է փոխել իր քաղաքական գույները, որ պարզապես անհնար է հիշել։ Նա որպես քաղաքական գործիչ որևէ վստահություն չունի։ Այն, ինչ նա ունի, պետական վարչական ռեսուրսներն են՝ հարձակվելու, ձերբակալելու և ճնշելու համար։ Պարզ ասեմ՝ Սամվել Կարապետյանին չեն թույլատրել քարոզարշավ իրականացնել։ Նրան պահել են տանը, և միայն իր ու իր ընտանիքի հնարամտության շնորհիվ է, որ նա շարունակում է մնալ քաղաքական դաշտում։ Եվ իհարկե, նա արժեքավոր մարդ է։ Ի տարբերություն Փաշինյանի, պարոն Կարապետյանը մեծ

ԱՄՆ նախագահ Դոնալդ Թրամփը շաբաթավերջին իր ազգային անվտանգության թիմի հետ խորհրդակցություն է անցկացրել, հանդիպումը վերաբերել է Իրանի նկատմամբ Վաշինգտոնի հնարավոր հետագա քայլերին, հայտնել է CNN հեռուստաընկերությունը։ Նրա տվյալներով՝ խորհրդակցությունը տեղի է ունեցել ամերիկացի առաջնորդի՝ Վիրջինիա նահանգում գտնվող գոլֆ-ակումբում։ Հանդիպմանը, ի թիվս այլոց, մասնակցել են փոխնախագահ Ջեյ Դի Վենսը, պետքարտուղար Մարկո Ռուբիոն, ԿՀՎ ղեկավար Ջոն Ռեթքլիֆը և ամերիկյան վարչակազմի ղեկավարի հատուկ բանագնաց Սթիվ Ուիթքոֆը։ Նշվում է, որ Սպիտակ տան ղեկավարը, ինչպես ակնկալվում է, շաբաթվա ընթացքում կրկին կհանդիպի ազգային անվտանգության թիմի ներկայացուցիչների հետ։ CNN-ը նշում է, որ Փենտագոնը մի քանի ծրագիր է պատրաստել Իրանի դեմ հարվածներ հասցնելու վերաբերյալ, եթե Թրամփը որոշում ընդունի վերսկսել ռազմական գործողությունները Իսլամական Հանրապետության դեմ։ Թիրախների ցանկում, գրում է CNN-ը, ներառված են իրանական էներգետիկայի և ենթակառուցվածքների օբյեկտներ։ Հղումը՝ News.am

ԱՄՆ նախագահ Դոնալդ Թրամփը ուրբաթ օրը Չինաստանից վերադարձել է՝ կանգնելով Իրանի հարցով կարևոր որոշումներ ընդունելու անհրաժեշտության առաջ, քանի որ նրա գլխավոր օգնականները մշակել են ռազմական հարվածներին վերադառնալու ծրագրեր, եթե Թրամփը որոշի փորձել փակուղուց դուրս գալ նոր ռմբակոծությունների միջոցով, գրում է The New York Times-ը։ Օգնականների խոսքով՝ Թրամփը դեռ պետք է որոշի իր հետագա քայլերը։ Շահագրգիռ երկրների պաշտոնյաները փորձում են հասնել փոխզիջման, որը կդրդի Իրանին կրկին բացել Հորմուզի նեղուցը և Թրամփին թույլ կտա հայտարարել հաղթանակի մասին ու փորձել համոզել թերահավատ ամերիկացի ընտրողներին, որ Իրանում իրականացված ծախսատար և մահաբեր ռազմական ներխուժումն ավարտվել է հաջողությամբ, նշում է պարբերականը։ Մերձավորարևելյան աղբյուրների խոսքով՝ հրադադարից հետո իրականացվում է առավելագույն ակտիվ նախապատրաստություն՝ արդեն հաջորդ շաբաթվանից Իրանի դեմ հարվածները վերսկսելու նպատակով։ Քննարկվում են Իսլամական Հանրապետության ենթակառուցվածքային օբյեկտների նկատմամբ ավելի ագրեսիվ հարվածների սցենարներ, ինչպես նաև հատուկջոկատայինների մասնակցությամբ գործողություն՝ Իսֆահանում միջուկային նյութերը դուրս բերելու նպատակով։ Հղումը՝ News.am

ԱՄՆ Տեխաս նահանգի Տամպա քաղաքի ոստիկանությունը 22 երիտասարդի է ձերբակալել: Նրանք փորձել են զավթել հանրային զբոսայգու տարածքը: Տամպայի քաղաքային իշխանությունների կայքի փոխանցմամբ՝ միջադեպը վերածվել է զանգվածային ծեծկռտուքի և անկարգությունների: «Ուրբաթ երեկոյան իրականացված հատուկ գործողության շրջանակում Տամպայի ոստիկանները ձերբակալել են 12-ից 21 տարեկան 22 անձի։ 2026 թվականի մայիսի 8-ին դեռահասների մի մեծ խումբ փորձել է իր հսկողության տակ վերցնել Քերտիս Հիքսոնի անվան զբոսայգու տարածքը, ինչը հանգեցրել է մասշտաբային անկարգությունների, ծեծկռտուքների և այլ խնդիրների», — նշված է հայտարարության մեջ։ Նշվում է, որ նրանցից միայն երեքն են չափահաս։ Ձերբակալվածներին մեղադրանքներ են առաջադրվել ծեծկռտուքների մասնակցելու, թմրամիջոցներ պահելու, ինչպես նաև ապօրինի լերպով զենք կրելու համար։ Հղումը՝ News.am

ԱՄՆ-ն պահանջում է, որ Իրանը պաշտոնապես հրաժարվի միջուկային զենքի ստեղծման՝ իր ձգտումից, ապամոնտաժի իր միջուկային օբյեկտները և պահպանի ուրանի հարստացման մորատորիումը, հաղորդում է The Wall Street Journal-ը՝ հղում անելով ԱՄՆ բարձրաստիճան պաշտոնյաներին։ Ըստ հրապարակման, Վաշինգտոնի կողմից սահմանված են վեց կարմիր գծեր, որոնք նաև ծառայում են որպես «լավ գործարքի» հասնելու պայմաններ. Ենթակառուցվածքների ապամոնտաժում՝ Իրանի կողմից Ֆորդոյի, Նաթանզի և Սպահանի օբյեկտների ապամոնտաժումը, ինչպես նաև բոլոր ստորգետնյա միջուկային օբյեկտների, այդ թվում՝ ուրանի և պլուտոնիումի հարստացման օբյեկտների ոչնչացումը։ Միջուկային վերամշակման տեխնոլոգիաների արտադրության և ներմուծման արգելք։ Ուրանի տեղափոխում. թերթը նշում է, որ վտանգը ոչ միայն մինչև 60% հարստացված ուրանի, այլև մինչև 20% և ավելի ցածր հարստացված նյութի մեջ է, քանի որ այն կարող է օգտագործվել ծրագիրը արագ վերականգնելու համար։ Ստուգումներ. Ատոմային էներգիայի միջազգային գործակալության (ԱԷՄԳ) տեսուչների լիազորությունների ընդլայնում, այդ թվում՝ միջուկային գործունեության հետ կապված ցանկացած օբյեկտ մուտք գործելու հնարավորություն։ Իրանում մշտական ​​տեսչական առաքելության ստեղծումը դիտարկվում է որպես օպտիմալ տարբերակ։ Լիակատար թափանցիկություն. Թեհրանը պետք է բացահայտի իր անցյալի միջուկային գործունեության մասին տեղեկատվությունը, որպեսզի ՄԱԳԱՏԷ-ն կարողանա վերականգնել մոնիթորինգի շարունակականությունը։ Իրանին այս պահանջից ազատելը, պնդում են, կհեշտացնի խախտումների թաքցնելը։ Հորմուզի նեղուց՝ բոլոր մաքսատուրքերի, հանքարդյունաբերության և պարտադրված երթուղիների արգելք, ինչպես նաև նավարկության ազատության լիակատար վերականգնում։ Պատժամիջոցներ․ սանկցիաների մեղմացումը պետք է կախված լինի Թեհրանի վարքագծից, այլ ոչ թե միայն համաձայնագրի ստորագրումից։ Մեկ օր առաջ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները «շատ լավ» բանակցություններ է վարել Իրանի հետ։ Նա հավելել է, որ «բավականին հնարավոր է», որ երկու կողմերը շուտով կարողանան համաձայնության գալ և վերջ դնել հակամարտությանը։ «Մենք հիմա լավ ենք գործում, և պետք է ստանանք այն, ինչ պետք է ստանանք։ Եթե դա չանենք, ստիպված կլինենք մեծ քայլ անել առաջ։ Բայց նրանք ուզում են համաձայնության գալ», — ասել է Թրամփը։ Նրա խոսքով՝ Թեհրանը համաձայնել է Վաշինգտոնի գլխավոր պահանջին՝ հրաժարվել իր միջուկային զենքի ծրագրից։ Այնուամենայնիվ, Իրանի իշխանությունները դեռևս չեն մեկնաբանել ԱՄՆ նախագահի հայտարարությունը։ Հղումը՝ Hraparak.am