Քաղաքականություն

«Ուժեղ Հայաստան» դաշինքի առաջնորդ Սամվել Կարապետյանը մեկնաբանել է վարչապետ Նիկոլ Փաշինյանի նախընտրական քարոզարշավի ընթացքում դրսևորվող վարքագիծը՝ անդրադառնալով հատկապես կանանց նկատմամբ հնչող կոշտ արտահայտություններին և ինքնատիրապետման կորստի դեպքերին։ Կարապետյանի խոսքով՝ նման վարքագիծը պայմանավորված է դաստիարակությամբ։ Նա նշել է, որ իր մոտ տպավորություն է ստեղծվել, թե որոշ մարդկանց արժեհամակարգի ձևավորման վրա ազդեցություն են ունեցել ծայրահեղական մտածողությամբ խմբեր, ինչի հետևանքով նրանք իրենց թույլ են տալիս անհարգալից վերաբերմունք ցուցաբերել տարեցների, կանանց և անգամ երեխաների նկատմամբ։ Դաշինքի առաջնորդը նաև ընդգծել է, որ իրենց նպատակներից մեկը հայ կնոջ արժանապատիվ կերպարի վերականգնումն է։ Նրա խոսքով՝ ապագայում հնարավոր է նաև, որ Հայաստանը ղեկավարի կին քաղաքական գործիչ։ «Ես տպավորություն ունեմ, որ փոքրիկ խմբակի դաստիարակությամբ զբաղվել են «Գորշ գայլերը»։ Միայն այդ դեպքում կարող են մարդիկ իրենց թույլ տալ այդպիսի պահվածք՝ մեծերի, կանանց, նույնիսկ երեխաների նկատմամբ»,- նշել է նա: Հղումը՝ Hraparak.am

Այսպես՝ Հայաստանում ապրում են․ – Մոտ 1,2 միլիոն «շուն ու շանգյալներ» (ըստ սոցիոլոգիական հետազոտությունների՝ հենց այդքան են կազմում «պատերազմի եռագլուխ հրեշի» աջակիցներն ու նրանց ընտանիքների անդամները), – Մոտ 100 հազար արցախցիներ, որոնք «թողել-փախել են, ու դեռ պիտի բացատրություն տան, թե ինչո՞ւ չեն մեռել, ինչո՞ւ են կենդանի մնացել», – 44-օրյա պատերազմին մասնակցած «11 հազար դասալիքներ» և «600 հազար պոտենցիալ դասալիքներ» (սա ասել է Աննա Հակոբյանը՝ նկատի ունենալով Հայաստանի զինապարտության տարիքի բոլոր տղամարդկանց), – «Խոպանչիների» ընտանիքների անդամները՝ 250-300 հազար հոգի, ովքեր ապրում են Հայաստանում, օգտվում են ճանապարհներից, բայց ձրիակերների նման՝ «լայաղ չեն անում» դրսից իրենց ուղարկված գումարներից հարկեր վճարել, – Նախկին իշխանությունների օրոք «պատերի տակ վնգստացող դատավորներ», «ծախու լրագրողներ», «կաշառակեր չինովնիկներ», «5-10 հազարով իրենց ձայները ծախողներ» և այլն, մի խոսքով՝ ևս մի 300 հազար հոգի։ Տակն ո՞վ մնաց։ Ճիշտ է, կերած-խմած ու բոլոր իշխանությունների օրոք թաղապետարանների մերձակայքում մանր-մունր գործեր «կպցնող» «տասովչիկները», իշխանական թափառախմբին ուղեկցող ու Նիկոլին պաչպչող կանայք ու «հորս արև, զենք տու՝ էթամ դրանց սաղին գյուլլեմ» լմլմացնող քյոփակները։ Մի խոսքով՝ նրանք, ովքեր, Նիկոլ Փաշինյանի կարծիքով, հենց «իսկական ժողովուրդն» են։ Մարկ ՆՇԱՆՅԱՆ Նկարը՝ Ռուբեն ՄՈՒՐԱԴՅԱՆԻ Հղումը՝ Aravot.am

ԱԺ ընտրություններին մասնակցության հայտ ներկայացրած «Բոլորին դեմ եմ» կուսակցության անդամները ռեկորդային թվով ինքնաբացարկներ են ներկայացրել` ցուցակի 87 թեկնածուից 50-ը ինքնաբացարկ է հայտնել։ «Հրապարակ»-ի հետ զրույցում կուսակցության ընտրական ցուցակի 5-րդ համար Միքայել Նահապետյանն ավելի վաղ հայտնել էր, որ այս պրոցեսում մարդկանց պատգամավոր դառնալը չէ, որ հետաքրքրում է։ «Մենք ի սկզբանե հայտարարել ենք, որ կոնկրետ խնդիր ենք լուծում․ մեր ցուցակի անդամները մեր առաջ քաշած ռեֆորմները կյանքի կոչելու ճանապարհին կոնկրետ ֆունկցիա ունեն՝ ԱԺ անցնելու դեպքում քվեարկեն մեր առաջ քաշած 3 օրենքների փոփոխությանը՝ ապահովելով արտահերթ ընտրությունների նշանակումը»։ Նշենք, որ քաղաքական ուժերը ԿԸՀ նախընտրական ցուցակ ներկայացնելիս պետք է ցուցակում ներառված ունենան նվազագույնը 80 թեկնածու, իսկ առավելագույնը՝ 300։ Սակայն քաղաքական ուժի գրանցումից հետո այլեւս էական չէ, թե քանի թեկնածու ինքնաբացարկ կհայտնի։ Այսինքն՝ ինքնաբացարկները հիմք չեն կարող լինել, որ քաղաքական ուժի գրանցումը անվավեր ճանաչվի։ Հղումը՝ Hraparak.am

Ինչպես 2021 թվականին Զանգեզուրի պղնձամոլիբդենային կոմբինատի դեպքում, Արարատի ցեմենտի գործարանը ևս կազգայնացվի։ Այս մասին մայիսի 20-ին հայտարարել է արձակուրդում գտնվող ՀՀ վարչապետ Նիկոլ Փաշինյանը՝ Լոռու մարզի Շնող գյուղում իրականացնելով երկրում ներկայումս իշխող «Քաղաքացիական պայմանագիր» կուսակցության նախընտրական քարոզչությունը։ «Շատ շուտով ԲՀԿ ղեկավար Գագիկ Ծառուկյանի բիզնես ողնաշարը՝ Արարատի ցեմենտի գործարանը, լինելու է պետական և պատկանելու է Հայաստանի Հանրապետությանը, քանի որ Գուլոյան–Ծառուկյան (Կարապետ Գուլոյանը՝ Գագիկ Ծառուկյանի փեսան –խմբ.) այդ մաֆիայի մախինացիան բացահայտվել է, և ՀՀ կառավարությունն արդեն իսկ գրություն է ստացել դատախազությունից, որ այդ գույքը ենթակա է պետականացման», — ասել է Փաշինյանը։ Նա, մասնավորապես, զուգահեռներ է անցկացրել «Հայաստանի էլեկտրական ցանցեր» ընկերության հետ։ Վարչապետի խոսքով՝ Արարատի ցեմենտի գործարանը շուտով կազգայնացվի։ «Ես Արարատի ցեմենտի գործարանի բոլոր աշխատակիցներին շնորհավորում եմ ազատագրման առիթով։ Դուք այս պահից սկսած այլևս կարիք չունեք կատարելու Ծառուկյանի, Գուլոյանի որևէ հրահանգ, քանի որ նրանց գործատուն այլևս Հայաստանի Հանրապետությունն է»,- վստահեցրել է նա՝ կոչ անելով աշխատակիցներին այս պահից սկսած հետևել Կառավարության հրահանգներին։ Հղումը՝ News.am

Նիկոլ Փաշինյանն ու իր թիմը որոշել են ագրեսիվ ձեւով թիրախավորել բռնի տեղահանված, տնից ու հայրենիքից զրկված արցախցիներին, նրանց նկատմամբ ատելության խոսք կիրառել եւ նրանց մեղադրել իրենց հայրենիքի կորստի համար: Համացանցում ինչ-որ անհայտ տեսանյութ է հրապարակվել, որում դիմակավորված անձինք իբրեւ թե Արցախի բարբառով Նիկոլ Փաշինյանի հասցեին սպառնալիքներ են հնչեցնում։ Այդ տեսանյութը ոչ մի լրատվամիջոց չի տարածել, բացի ՔՊ-ին առնչվող լրատվամիջոցներից ու ՔՊ անդամներից: Թե որքանով է այդ տեսանյութն իրական, ով է այն նկարահանել, ինչ նպատակով, արցախցինե՞րն են խոսում, թե՞ հատուկ արցախցիների բարբառով են խոսում, անհայտ է: ՔՊ-ն ինֆորմացիոն առիթ է ստացել` ողջ թիմով արցախցիների դեմ նորից գրոհ սկսելու համար: Քանի օր է՝ ՔՊ-ական բետեեռները ֆեյսբուքյան լայվերի ու գրառումների միջոցով արցախցիներին են թիրախավորում: Սա էլ, կարծես, քիչ էր, Նիկոլ Փաշինյանը Երեւանի փողոցներում արցախցիների հետ է ընդհարվում: Իսկ արցախցի Արտուր Օսիպյանը, որը նախկինում ջերմեռանդ նիկոլական էր եւ ակցիաներ էր կազմակերպում Արցախի նախագահ Շահրամանյանի դեմ, վերջին հայհոյանքներն էր տեղում Ռուբեն Վարդանյանի հասցեին, հայտնվեց անհավասարակշիռ վարչապետի թիրախում, ապա ձերբակալվեց: Նիկոլ Փաշինյանն այնքան հունից դուրս եկավ, որ սկսեց ափսոսանք հայտնել, թե ինչու Օսիպյանը չի զոհվել։ «Ինչո՞ւ չես զոհվել, բա գնայիր զոհվեիր, խի՞ ես կենդանի»,- բղավում էր նա՝ մոռանալով, որ իր թիմում հիմա «չզոհված» արցախցիներ են աշխատում, օրինակ` ԱԽՔ Արմեն Գրիգորյանը, ԶՈՒ ԳՇ պետը եւ այլք: Ինչո՞ւ է ռեժիմը կրկին թիրախավորել արցախցիներին: Զրուցել ենք Շուշիի քաղաքապետ Արծվիկ Սարգսյանի հետ: — Նիկոլ Փաշինյանն ու իր թիմը ասում են, որ արցախցիներն ահաբեկիչներ են` փորձել են ահաբեկչություն իրականացնել Փաշինյանի դեմ: Հավատո՞ւմ եք այդ մեղադրանքներին: — Ազգի պառակտման նոր ձեւ է սա: Պետք է պարզել, թե ով կամ ովքեր են այդ ամենի կազմակերպման ետեւում կանգնած, թեպետ ես մոտավորապես գլխի եմ ընկնում, թե ում ձեռագիրն է: Մեր հայ ազգն այնքան էլ մեծ ազգ չէ, եւ չի կարելի նման ձեւով ազգը հերթական անգամ պառակտել: Ընտրություններից հետո էլ կյանք կա, չի կարելի: Լավ կլինի, որ իրար երես նայելու տեղ թողնեն: Մանավանդ որ արցախցիների վիճակը վատ է, տուն-տեղ ենք կորցրել, ամեն ինչ թողել ենք այնտեղ, հիմա հերթական լարվածությունն են փորձում առաջացնել: Ինձ երբեմն թվում է, թե այս ամենն Ադրբեջանի կողմից է ֆինանսավորվում եւ իրականացվում: — Հատկապես իշխանությունն է այդ ձայնագրությունները տարածում եւ արցախցիների դեմ ատելություն սերմանում: — Դե, իրենց ձեռնտու է լարվածություն ստեղծելը: Սրանք կեղտոտ խաղեր են, որոնց չի կարելի տուրք տալ: Այն մեր ազգին վնասում է: Վաղը կվերանա այս մթությունը, նորից լույս կբացվի, եւ ես դեմ եմ, որ այսպես ազգին պառակտում են: — Նիկոլ Փաշինյանը 5 հազար զոհ տալուց հետո ափսոսում է, որ բոլոր արցախցի տղամարդիկ չեն զոհվել` դեռ ապրողներ կան: Նա Արտուր Օսիպյանին ասում էր` ինչո՞ւ չես զոհվել: — Ես այդ տղային ճանաչում եմ, նա միշտ ընդդիմություն է եղել: Ես նրա խոսքում ոչ մի ավելորդ բան չտեսա: Ուղղակի պատմում էր, թե ինչեր են տեղի ունեցել Արցախում, բայց վերջում ինչ ասես՝ ասաց այդ տղային, անեծքներ տվեց, չի կարելի…. չի կարելի նման խոսքեր ասել, կռվի ժամանակ պետք է հաշտության տեղ թողնել, չի կարելի կամուրջներն այրել անվերադարձ: Ճակատագիր է, մահացողները մահացան, ապրողներն էլ ապրում են: Ո՞վ էր ուզում, որ իր հարազատը զոհվի: Օրինակ` իմ եղբայրը զոհվեց, ո՞վ կուզենար, որ նա զոհվեր: Կռիվ էր, մի մասը զոհվեց, մի մասը` բախտի բերմամբ, թե պատահմամբ, ողջ մնաց, ես էլ ողջ եմ մնացել, ու ի՞նչ: Ո՛չ փախել ենք, ո՛չ վախեցել ենք, միշտ էլ թուրքի առաջ կանգնել ենք ու պատրաստ ենք եղել կռվելու: Հիմա ի՞նչ անենք: Հազար սնարյադ է պայթել աչքիս առաջ, ի՞նչ անեմ, որ չեմ զոհվել: Մի քանի անգամ վիրավորվել եմ, բայց չեմ մահացել: Դե հիմա էդպես է ստացվել, ես ի՞նչ անեմ, իմ ճակատագիրն էլ այդպես էր: Տղայիս մոտ էլ լիքը սնարյադներ են պայթել, կողքի տղաները զոհվել են, ինքը` չէ: Ամեն մեկի ճակատին մի բան է գրված եղել: Քոռ գյուլլեն որ գալիս է, ոչ մեկի անեծքին ուշադրություն չի դարձնում: Անեծքը սատանայական բան է, մարդու մահը ցանկանալը` եւս: Հղումը՝ Hraparak.am