Քաղաքականություն

Հղումը՝ Hraparak.am

Ընտրակաշառք տալու, ստանալու, ինչպես նաև բարեգործության արգելքը խախտելու դեպքերի առթիվ վերջին 2 օրում ձերբակալվել է 21 անձ, հայտնում են Հակակոռուպցիոն կոմիտեից։ Ընտրակաշառք տալու, ստանալու, ինչպես նաև բարեգործության արգելքը խախտելու դեպքերի առթիվ ՀՀ հակակոռուպցիոն կոմիտեում քննվող քրեական վարույթների շրջանակներում միայն վերջին երկու օրվա ընթացքում ձերբակալվել է 21 անձ, որոնցից 13-ի նկատմամբ որպես խափանման միջոց է կիրառվել կալանքը։ Հղումը՝ Newday.am

«Հայաստան» դաշինքի պատգամավորի թեկնածու Մեսրոպ Մանուկյանն այսօր շրջել է Աջափնյակ վարչական շրջանում, լսել քաղաքացիների դժգոհությունները։ «Ժողովուրդ, այս կալցեվոն ճի՞շտ են սարքել: Ինչքան է մարդկանց գժվացնում, ասեք: Ուրեմն նայեք, այս կալցեվոն սարքել են, իրենց արևին, ու ամբողջ օրը մարդկանց նեղություն են տալիս: Այստեղ պետք է լիներ էստակադա, այստեղ պետք է լիներ ստորգետնյա անցում, որոնք չկան: Ամբողջ օրն այստեղ խցանումներ են»,- ասաց Մանուկյանը։ «Հայաստան» դաշինքից մեկ այլ թեկնածու՝ Արմենակ Դանիելյանն էլ ասաց, որ ոստիկանությանը հարցում են արել ու պարզել, որ նշված վայրում տարեկան 380 վթար է լինում, դա նշանակում է՝ ամեն օր առնվազն մեկ վթար։ Քաղաքացիները ևս դժգոհեցին «կալցեվոյից»։ Կային քաղաքացիներ, որ ասում էին՝ չսարքեին, ավելի լավ կլիներ։ «Այստեղ սովորական խաչմերուկ էր, այդ ժամանակ երթևեկությունն ավելի լավն էր՝ համեմատած այսօրվա կալցեվոյի: Կալցեվո են սարքել, որովհետև ավելի էժան էր, այնինչ այնտեղ նախատեսված էր էստակադա, բայց կառուցել են էժանագին կալցեվո»,- ասաց պատգամավորի թեկնածուն։ Պատգամավորի թեկնածու Լևոն Քոչարյանն էլ աստվածաշնչյան Պիղատոսի օրինակով, որը ձեռքերը լվաց Քրիստոսի խաչելության որոշման հարցում ու պատասխանատվությունը գցեց ժողովրդի վրա, անդրադարձավ Փաշինյանին. «Այ մարդ, քեզ ժողովուրդը չի ընտրել, որ այս որոշումները կայացնես: Քեզ չի ընտրել, որ գնաս Ալիևի դեմը չոքես ու ասես՝ Արցախը Ադրբեջան է, չի ընտրել, որ այսքան զոհեր տաս ու մնացածը»։ Հղումը՝ Aravot.am

Հունիսի 7-ի ընտրությունների նախընտրական քարոզարշավում «մարտեր առանց կանոնների» ժանրով առաջնորդվող Նիկոլ Փաշինյանի վարքը, ինչպես արդեն գրել էինք, անհանգստացնում է նաեւ յուրայիններին։ ՔՊ-ում մեծ թվով մարդիկ կարծում են, որ իրենց առաջնորդի անհավասարակշիռ պահվածքը, հատկապես քաղաքացիների վրա մատ թափ տալը, վիրավորելն ու սպառնալն իրենց ոչ թե առավելություն են բերելու, այլ՝ վարկանիշի կորուստ։ Սակայն, ինչպես մեր աղբյուրն է նշում, Փաշինյանի հաշվարկը բոլորովին էլ այն չէ, որ քարոզարշավի ընթացքում կարող է վարկանիշ բարձրացնել, հանրային կարծիք փոխել՝ հօգուտ իրեն, նա վաղուց է հասկացել, որ տանուլ է տալու քաղաքակիրթ պայքարում, չի կարողանալու պատասխանել ո՛չ ընդդիմախոսների, ո՛չ շարքային քաղաքացիների փաստարկներին, ուստի անցել է պլան Բ-ին։ Իսկ այդ պլանը կազմված է տեռոր անելու, սպառնալու, ղժղժալու, վախեցնելու գործիքներից, որով փորձում է հասնել նրան, որ առանց այն էլ Հայաստանի քաղաքական դաշտից հիասթափված հանրության մի որոշ հատված վերջնականապես հիասթափվի, հույսեր չկապի ընտրությունների հետ եւ որոշում կայացնի հունիսի 7-ին չգնալ ընտրատեղամաս։ Իսկ հայհոյանքն ու ղժղժոցը ակտիվացնեն գռեհիկ, ստորին խավին, որը 2018-ի հեղափոխական էյֆորիային է կարոտել եւ կարող է գնալ ընտրության, որ «նախկինները հետ չգան»։ Փաշինյանի հույսն այն է, որ ընտրություններում 50 տոկոսից ցածր մասնակցություն կգրանցվի, իսկ ինքը կմոբիլիզացնի իշխանական զանգվածին ու հասարակության անկիրթ հատվածին, կտանի տեղամասեր եւ փոքրաթիվ մասնակցության պարագայում կհաղթի։ Փաշինյանն ակնհայտորեն կտրվել է իրականությունից, ժողովրդի հետ չի շփվում, հակառակ դեպքում կտեսներ, կհասկանար, որ վերջին օրերի իր պահվածքն ավելի շատ հակառակ էֆեկտն է թողել․ եթե տատանվող ընտրազանգվածի ներկայացուցիչները մինչեւ վերջերս երկմտում էին՝ ընտրություններին մասնակցել, թե ոչ, ապա բժիշկ տիկնոջ, արցախցի տղամարդու հետ միջադեպերից հետո այլեւս հասկացել են, որ իրենցից յուրաքանչյուրը Փաշինյանի վերընտրվելուց հետո կարող է հայտնվել նրանց կարգավիճակում։ Մեր իշխանական աղբյուրը խոստովանեց նաեւ, որ Փաշինյանի մյուս հաշվարկն այն է, որ բռնաճնշումների ենթարկեն ընդդիմադիր մրցակիցներին։ Սկզբում մտածում էին խաղից դուրս թողնել Սամվել Կարապետյանի ուժին, եւ դա էր նաեւ պատճառը, որ նման քանակի կեղծ վարույթներ էին հարուցում ընտրակաշառքի վերաբերյալ, ինչ-որ ձայնագրություններ դնում շրջանառության մեջ, մարդկանց կալանավորում՝ փորձելով տպավորություն ստեղծել, թե գործ ունեն ընտրազեղծարար ուժի հետ, ապա հիմա կարծես թե հասկացել են, որ չեն մարսի Կարապետյանի ուժին խաղից դուրս թողնելը, եւ հիմա նրա փոխարեն դիտարկում են Գագիկ Ծառուկյանին։ Իմաստն այն է, որ ընդդիմադիր կոալիցիա ձեւավորելու հնարավորությունը չեզոքացվի։ Բայց դա անելու են ոչ թե իրավական ճանապարհով, այլ փորձելու են ճնշել Ծառուկյանին, որ նա իր կամքով «զադնի դնի» եւ դուրս գա ընտրապայքարից, քանի որ ԲՀԿ-ի գրանցումը կասեցնելը հեշտ չէ։ Այս սցենարի շրջանակներում է հարուցվել Անդրանիկ Թեւանյանի գործը, որին առավոտ շուտ ձերբակալեցին, եւ առավոտյան ժամը 7-ին ԱԱԾ դիմակավորված անձինք նրա կուսակցության գրասենյակում խուզարկություններ արեցին։ Զուգահեռ, խուզարկություններ էին կատարում նաեւ ԲՀԿ ցուցակի թեկնածու, գործող պատգամավոր Մարտուն Գրիգորյանի՝ Գյումրիում գտնվող բնակարանում։ Մի քանի օր առաջ էլ Փաշինյանը սպառնացել էր Գագիկ Ծառուկյանից վերցնել «Արարատցեմենտ» գործարանը, եւ անգամ դատախազությունը հաղորդագրություն էր տարածել։ Սակայն ԲՀԿ-ի մեր աղբյուրները հավաստիացնում են, որ Ծառուկյանը մինչեւ վերջ գնալու է՝ «զադնի» չի լինելու։ Հղումը՝ Hraparak.am